Étiquette : دونور

كود سبور//

طرحت لطيفة الشريف النائبة البرلمانية عن الفريق الاشتراكي وقائع أعمال الشغب اللي عرفها ستاد دونور فماتش الديربي الأخير ما بين الوداد والرجاء ضمن منافسات البطولة الإحترافية لكرة القدم، وطالبت بإغلاق المركب الرياضي محمد الخامس بالدار البيضاء وبناء تيران جديد.

النائبة البرلمانية لطيفة الشريف وجهت سؤال كتابي لوزير الرياضية شكيب بنموسى بخصوص الإجراءات اللي غادي تقوم بها الوزارة ضد للحد من ظاهرة الشغب الرياضي فحال كيفما كيوقع فالديربي، ووقتاش غادي يتبنى تيران جديد فكازا يقدر يكون فيه التنظيم أحسن.

وقالت البرلمانية الاشتراكية: “من بعد إطلاق صافرة نهاية ماتشات كرة القدم اللي كتلعب بمركب محمد الخامس بالدار البيضاء، كتنطلق مباريات أخرى خارج الملعب، مرة بأحداث الشغب اللي كيحدثها أنصار الفرق المتبارية وكرة نتيجة ما تحدثه تصرفات الجماهير وتدخل قوات الأمن لاحتواء الوضع، وكنوقفو كـل مرة عـلـى العديد من التجاوزات اللي كتخدش صورة ومجهودات بلادنا في مجال الرياضة، كمـا هـو الحـال بالنسبة لمباراة الديربي بين الغريمين التقليبيين فريقا الرجاء والوداد البيضاويين”.

وواصلت لطيفة الشريف توضيح المشاكل اللي كيتوقع فالديربي وقال: “كنسجلو ولوج القاصرين للتيران بدون مرافقين وتنامي مظاهر الفوضى والشغب خارج الملعب وهاذشي كيترتب اعتداءات على رجال الأمن والسلطة وممتلكات المواطنين والدولة، وكيخلف خسائر بالجملة، الأمر اللي يتطلب إغلاق هذا المركب وبناء مركب جديد يتسع للاعداد الهائلة للجماهير ويضمن سلامة المواطنين ورجال الأمن والسلطات العمومية، هاذشي علاش كنسولكم اسي الوزير، على الإجراءات اللي غادي ديرها الوزارة للحد من مظاهر الفوضي والشغب اللي كتجي من مورا ماتشات كرة القدم بمركب محمد الخامس بالدار البيضاء، وعلى الافق الزمني لبناء ملعب جديد لمدينة الدار البيضاء”.

إقرأ الخبر من مصدره

كود سبور//

سلطت الجامعة الملكية المغربية لكرة القدم عدد من العقوبات على الوداد والرجاء بناء على الأحداث اللي عرفها ماتش الديربي اللي تلعب الأحد الماضي بين الفريقين فستاد دونور فكازا، ضمن الجولة 7 من البطولة الإحترافية لكرة القدم.

وقررت اللجنة المركزية  التأديب التابعة للجامعة تغريم فريق الوداد الرياضي مبلغ 60 ألف درهما، لاستعمال جماهيرو للشهب الإصطناعية، فكثر من مرة الأمر اللي أدى إلى توقيف اللقاء الذي جمعه بفريق الرجاء الرياضي في مناسبتين الأولى لمدة 3 دقائق والثانية لمدة 4 دقائق وذلك بناء على المادة 105 من مدونة التأديب.

الرجاء الرياضي حتى هو تم تغريمو مبلغ 30 ألف درهما، لاستعمال جماهيرو للشهب الإصطناعية، أكثر من مرة خلال المباراة اللي جمعتو بفريق الوداد الرياضي وذلك بناء على المادة 105 من مدونة التأديب.

وتم كذلك تغريم فريق الرجاء الرياضي مبلغ 2000 درهما، حيث تحصل على 4 انذارات خلال المباراة اللي جمعتو بفريق الوداد الرياضي وذلك بناء على المادة 89 من مدونة التأديب.

والوداد الرياضي حتى هو تغريم فريق الوداد الرياضي مبلغ 2000 درهما، حيث تحصل على 7 انذارات خلال المباراة التي جمعته بفريق الرجاء الرياضي وذلك بناء على المادة 89 من مدونة التأديب.

إقرأ الخبر من مصدره

كود سبور//

قرر الوداد ينهي التحضيرات ديالو غدا الجمعة لمواجهة مولودية وجدة فالجولة 7 من منافسات البطولة الاحترافية لكرة القدم اللي غادي تلعب السبت الجاي فوجدة.

وغادي يخوض الوداد الرياضي الحصة التدريبية الأخيرة ديالو استعدادا لماتش المولودية الوجدية غدا الجمعة فتيران بنجلون ويشد من بعد منها الطيارة من لكازا الوجدة، باش يلعب السبت ضدد مولودية وجدة فتيران دونور ديال وجدة.

وغادي يسافر الوداد الرياضي لمدينة وجدة وهو معول على الرباح وتحقيق 3 بوان يعزز بها صدارتو للبطولة، خصوصا وأنه كيدوز من مرحلة زوينة، عكس مولودية وجدة اللي كيدوز من فترة صعيبة.

إقرأ الخبر من مصدره

كود سبور//

ربح الوداد الرياضي النسوي ماتش الديربي ضد الرجاء الرياضي اليوم السبت فتيران روش نوار فكازا، فمنافسات البطولة الوطنية للسيدات بحصة كبيرة.

وتمكن الوداد من تحقيق رباح كبير على الرجاء بنتيجة 5 لزيرو، بحيث خرجت الحمرا رابحة فالشوط الأول بنتيجة 2 لزيرو، وفالشوط الثاني زادت 3 بيوتا آخرين فمرمى الرجاء وسالا الماتش بحصة 5 لزيرو.

للإشارة فالديربي النسوي بين الوداد والرجاء واللي سالا لمصلحة الواك، كيسبق الديربي ديال الرجال اللي غادي يتلعب غدا الأحد فستاد دونور ضمن مؤجل الجولة 6 من منافسات البطولة الاحترافية لكرة القدم.

إقرأ الخبر من مصدره

كود سبور//

أكد منير الكبير مدرب الرجاء الرياضي أن الماتش ديال الديربي الأحد الجاي فستاد دونور فمؤجل الجولة 6 من البطولة غادي يكون صعيب، حيث الوداد فريق قوي.

وقال التونسي منذر الكبير مدرب الرجاء فتصريح له: “الوداد كيدوز من فترة مزيانة وهو منافس عندو إمكانية كبيرة، والماتش ضدو غادي يكون صعيب، وكنحترموه”.

منذر الكبير اللي غادي يلعب أول ديربي ديال كازا قال: “درنا تحليل لنقاط قوة الوداد وغادي نحاولو نوقفوهم وغادي نلعبو بالأسلوب ديالنا وداكشي اللي كيميزنا، ونستغلو الوقت اللي كيكون لصالحنا ونديرو بلوك وندافعو ملي يكون الوقت فصالح الخصم”.

إقرأ الخبر من مصدره

مصطفى الشاذلي ـ كود سبور//

تصرفات طفولية رجاوية كتنزد عافية الشغب الرياضي فالبلاد. ففي الوقت لي الجمهور السوسي ما زال شاعل وكاينة تحركات قانونية وحقوقية على العبارات العنصرية العرقية لي ترددات فالماتش الأخير لي جمع بين الناديين، ومنها “واريح ريح هداك الشليح”، دارات إدارة الخضرا ما هو أسوأ من هذا السلوك الصادر عن بعض المحسوبين على الفريق.

فقبل ساعات من الديربي المنتظر، بعد غد الأحد، خرجات الصفحة الرسمية للنادي على حائطها بمنشورات مستفزة، نزلات فيها إلى مستوى الكلاشات الهابطة لي كتكون بين جماهير الغريمين، ولي كانت أكثر من مرة سببا في شحن الأجواء وجعلها أكثر توترا، قبل أن نشهد بعدها مآسي غير مشرفة وكتضر بصورة الكرة الوطنية.

واحد من هاد المنشورات دارت فيه الصفحة صورة بطة كتعوم فالما، وأرفقته بتدوينة تكتب فيها “سعيد برؤيتك قادما من تحت الماء. التشخيص الجيد يفتح الطريق لعودة محتملة”.. وهي التدوينة لي زادت عليها تعليق فالصورة كتبت فيه “لا يمكنك إنكار هويتك”.

هاد الخروج بطبيعة الحال ممرش مرور الكرام في مواقع التواصل الاجتماعي. إذ التقطته جماهير الغريمين ودخلات بيناتها فحرب كلامية خايبة، كل الخوف هو أن تترجم إلى أعمال عنف فأول لقاء بين جماهير الناديين في ملعب دونور بعد شهور طويلة غابت فيه الفرجة عن المدرجات بسبب جائحة (كوفيد ـ19).

وهادي ماشي هي المرة الأولى لي كيدار فيها بحال هاد السلوك المستفز فعهد مول الزبل البدراوي. فالموسم الماضي، دارو نفس القضية، إذ بعد الفوز في ديربي الإياب نشرات الصفحة صورة تيفو “البطة الراقصة”، وهو ما عكس عقلية الكلاشات لي ولات راسخة داخل الوازيز على طريقة رئيس النادي، لي تطلب منو، مؤخرا، يقلل من خرجات الإعلامية بعدما كانت مثار جدل كبير.

إقرأ الخبر من مصدره

كود سبور//

حقق الرجاء الرياضي أول رباح له فالميدان ديالو تيران ستاد دونور فكازا فهاذ الموسم، وذلك من بعدما انتصر اليوم السبت على فريق نيجليك من النيجيري فروتور الدور 32 من دوري أبطال إفريقيا.

وكان النيفو فالماتش اللي تلعب بلا جمهور ما بين الرجاء ونيجليك من النيجر متوسط بزاف وزكلو الرجاويين بزاف ديال لبيوت وحتى الأداء ديالهم ما عجبش عدد كبير من جمهور الفريق اللي تفرج فالتلفزة، وانتظر الفريق الأخضر الجولة الثانية باش يماركي بيت الرباح عن طريق محمد الناهيري اللي سجل الهدف الوحيد فالماتش فالدقيقة 79، وسجل من بعدها سفيان بنجديدة بيت ثاني للرجاء لكن ترفض من الحكم بداعي التسلل.

وتأهل الرجاء الرياضي من بعد هاذ الرباح لدور ليكروب من دوري أبطال إفريقيا، بمجموع مباراتي الألي والروتور، حيث كان ربح فالنيجر السيمانة اللي فاتت بنتيجة 2 لزيرو زائد البيت اللي ماركا اليوم فالروتور، مع العلم أن ماتش اليوم تلعب ويكلو بسبب العقوبة اللي مسلط الكاف على الرجاء.

إقرأ الخبر من مصدره

كود سبور//

دخل الوداد الرياضي فجو التركيز على الماتش اللي غادي يلعب الفريق ضد ريفرز يونايتد النيجيري يوم الأحد المقبل، فتيران المركب الرياضي محمد الخامس فكازا ضمن إياب دور 32 من دوري أبطال إفريقيا، واللي مطالب فيه بالفوز.

وكشف مصدر مطلع أن الوداد الرياضي دخل فتجمع إعدادي إستعدادا للمواجهة أمام ريفرز يونايتد، بحيث خاضو اللعابا تحت إشراف المدرب الحسين عموتة حصة تدريبية اليوم الخميس فتيران بنجلون وانتقلوا من بعد منها لواحد لوطيل فكازا.

وقرر الحسين عموتة رفقة إدارة الوداد يدخلو اللعابا فأجواء التركيز على الماتش من خلال هاذ المعسكر، باش يجنبوهم التأثيرات الخارجية ويخليو تفكيرهم مستقر على المباراة وتحقيق الرباح، وغادي يتدرب الفريق حصة غدا الجمعة وحصة يوم السبت، مع الرجوع مباشرة إلى الفندق مع نهاية كل حصة تحضيرا لماتش الأحد.

وغادي يكون الوداد الرياضي مطالب بتحقيق الانتصار على ريفرز يونايتد النيجيري يوم الأحد المقبل فستاد دونور ضمن إياب دور 32 من دوري أبطال إفريقيا، بهدف واحد لصفر على الأقل من أجل تجاوز الخسارة فنيجريا بهدفين مقابل واحد فماتش الألي من أجل التأهل إلى ليكروب ديال المسابقة ومواصلة الدفاع على اللقب اللي ربح الموسم الماضي.

إقرأ الخبر من مصدره