سهام البارودي- كود//
معروفين الناس د الجالية بالسخاء ديالهم، كايسيفطو لديورهم واليديهم خوتهم، و حتى قنوات يوتوب منتاعشين غا مع الجالية أما المغاربة د الداخل عايقين بالقوالب ! كاتلقى هيام سطار كاتشكر ناس الجالية شكر خاص حيت كايسيفطو ليها الأورو، مّي نعيمة، نعيمة الجوك، فتيحة روتيني اليومي، و گاع ابطال السوشل ميديا كون ماحشمو يبقاو يسلمو غا على ناس الجالية فالڤيديوات حيت هوما معامن واكلين الخبز، هوما لي كايسيفطو الكادويات و الفلوس و كايأثرو فيهم مشاهد الزلط لي كاينين فالبلاد أما حنا راه السعاية كانشوفهم كل نهار حدانا ها لي ناشر رجل مقطوعة ها يد خامجة ها لي مستفة ولادها مابقاوش كايأثرو فينا و عارفين بلي بزاف فيهم دايرها خدمة كايدخل منها اكثر من داكشي لي كايدخل واحد فالجالية!
و لكن هاد السخاء راه ماشي غا هكاك، راه عندو دوافع نفسية، الناس د الجالية الاغلبية فيهم كاتلقاهم عايشين صراع د الهوية فالغربة، موحشين البلاد، واخا عايشين فبلاد الحقوق و الكرامة و الفلوس و لكن ماكايحسوش براسهم فبلادهم داكشي علاش ديما كايبقا داك المصران بينهم و بين المغرب و كايبنيو الديور فالمغرب واخا يخليوهم مسدودين، و كايسيفطو الفلوس و كايمشيو كل عطلة.
الجالية حنينة و هشيشة ، هادشي علاش كايفتخوها بسهولة صحاب قال الله قال الرسول، فينما كاين شي حاشية مافيه ماينوض يخدم فالبرد مع السبعة د الصباح و يسوگ الرموك و لا يشطب الزنقة و لا يوقف سيكوريتي فشي سوبير مارشي، لا قراية لا خدمة كاينوض يربّي اللحية و يبدا يدير الدروس فالمساجد و يكشط فالعيالات يدّي ليهم ذهبهم و فلوسهم خاص غا يكون عندو مع الهضرة و التخلويض و التقشاب و لي بغاها ديالو ” الاخوات شكون تعاون معانا نبنيو مسجد ؟” “الاخوات شكون تساهم معانا بذهبها ؟” “الاخت الكريمة واش ممكن تساهمي معانا فشراء كسوة العيد للاطفال فالمغرب ؟” و الهبيلات طبعا كايجبدو و يمدّو ! كايلعبو ليهم على العاطفة و كايگريسيوهم !
شحال من واحد دار لاباس بفلوس التبرعات د الناس فمساجد اوروبا ؟ لا قراية لا خدمة لا حرفة و كاتلقاه صايگ رونج و باني الديور و مجوج جوج عيالات و غادي جاي لأوروبا كايضرب ليك غا التيشورتات لاكوسط و السبرديلات نايك و النضاضر خامجين ! باش ؟! باينة بفلوس عباد الله !
مايمكنش تسميوها حتى تجارة فالدين حيت الاغلبية الساحقة د هاد النوع ماشي فقها و تلقاهم خارجين من الابتدائي ! غا دراري ولاد الوقت قافزين عارفين الدين فيه الخبز كايلبسو ليه التوني ديالو ( الجلابة و اللحية) و يتلاحو يغمسو فالمرقة فحال لّي سبقوهم.
