سهام البارودي ـ كود//
مشكل كبير عند المغربيات المطلقات، بزّاف د الرجال ماكايبغيوش يخلصو النفقة د ولادهم، وآطونسيون ماشي غير المزاليط لي يمكن نقولو أنه كايضرروا ماديا من الطلاق لا حتى الطبقة المتوسطة والطبقة الغنية، المشكل ماشي مشكل مادي بقدر ما أنه مشكل ثقافي ونفسي عند الراجل! بزاف د المغاربة اين فوا كايطلق المرا كايطلق معاها حتى الولاد! وا هوا وسط البيت ديالو وكاتلقى نسبة مهمة مامسوقينش للدراري ولا للتربية ديالهم، كايخدم (لاكان ماگالسش ناشر ملاويه فالدار) كايجيب التقدية والمصروف وكايدخل للدار باش ياكل وينعس! مورا الطلاق القضية كاتزيد تقواد وكايتزاد على داك الإهمال الأول الإهمال المادّي! كايولي يحلف لا عطاها النفقة! خليها تمشي للمحكمة! كاين لي كايزور الوراق د الخدمة باش يخلص أقل نفقة ممكنة! كاين لي كاتلقاه بياع وشراي كبير عندو الدار والفلوس كي الروز، وكايوقف قدام القاضي حادر گمگومو باض يقوليه “كاتجيني غي شي ألفين درهم فالشهر آ سيدي”، بلا حشمة بلا حيا! كاين لي مستاعد يدوز الحبس ومايعطيش النفقة لولادو! بزاف د الرجال! بزاف ماكايصرفوش على ولادهم مورا الطلاق كايسمحو فيهم للمرا، كايتخلاو على الدور ديالهم كآباء، كايولي لا طار طار يجي يشوف ولدو من العيد للعيد! كايلوح الاولاد للأم ويمشي يعاود حياتو من جديد وهاد الحالات كانشوفوها حاليا وللأسف كاتشكل حالات كثيرة بزاف.
ديك النهار وأنا كانسمع للحوار ديال ممثلة معروفة كاتعاود فيه على المعركة ديالها مع الطليق ديالها لي بالمناسبة فنان كبير ومطلوب فالمسلسلات والأفلام ومخنوق فلوس، وكيفاش أنه كاتجمع عليه النفقة عاد كايخلصها ومضاربة معاه باش يخلصها! والسيد لاباس عليه ويمكن ليه يدير ليها ڤيرمون كل شهر أوطوماتيك للكونط ديالها باش تصرف على ولدو! لا! خاصو يخدم معاه المحامي والقاضي والعون القضائي، باش يصرف على ولدو لي من صلبو! آش آوا هاد الحماق؟
علاش بزاف د الرجال ماكايبغيوش يخلصو النفقة د ولادهم؟ علاش كايرفضو يتحملو المسؤولية مورا الطلاق؟
حيت مسمومين! براهش فمخهم! كايبغيو يعاقبو المرا بالدراري! ولكن علاش أصلا غايعاقب المرا ؟ كاين جوج د الحالات، إلى كانت هي لّي بغات تطلق منّو كايولي باغي يعاقبها حيت بغات تطلّق! حيت خلّاتو! ماكايتقبلش بكل روح رياضية أن المرا مابقاتش باغا تعيش معاه هوا لي مّو حياتها كاملة كاتقوليه “ولدي ألف وحدة تمنّاه” واخا هوا راسو قد الطّارو د نيدو. لا تفارقتي معايا ! مشيتي فحالك! ايوا أنا غانورّيك! والله لا صرفت على الدراري! كايولي باغي يعاقبها بالدراري! لي هوما ولادو حتى هوا ومسؤول أنه يصرف عليهم وعلى ماكلتهم ولباسهم وقرايتهم … لا! كايرفض !
وإلى كان هوا لي طلب الطلاق، كايطلق المرا وكاتولي تجيه ثقيلة يعطي ديك ثمنمية وللا ألف درهم د النفقة للمرا ! كايطلقها وكايبغي يبدا حياة جديدة فحالا ماعمرو كان تجوج وللا عندو ولاد آخرين، هوا ملزم أخلاقيا وقانونيا وحتى دينيا يصرف عليهم.
كاين لي كايقوليك واش غانعطيها فلوس تصرف بيهم على الزلاّل الجديد ؟! باش تلبس وتقاد وتشري الگراصن للزلال الجديد؟!
صافي هوما هادشي لي كايعرفو! باش يتهرب من المسؤولية ديالو كأب كايبدا يقلب على گاع الأسباب و التخربيق والخواض! كايتعامل بنفس العقلية ديال درّي صغير عندو ثلت سنين ماخليتيهش يخشي ليك ستيلو فزكك! كايتعصب ويبدا يبكي … يا بقاي مجوجة بيا وقبلي على هبالي ووسخي وأمراضي النفسية يا طلقي مني ونعاقبك حيت طلقتي منّي! نعاقبك نتي وولادك! أه نتي وولادك! يا الله!
إقرأ الخبر من مصدره
