سهام البارودي- كود//
فرحانين شي وحدين بالمونديال فقطر ! و فرحانين بالتنظيم ! قاليك براڤو قطر لي ماخضعاتش لقيم الغرب و نظمات مونديال ” اسلامي” منعات فيه الشراب و المثليين ! فرحانين بزاف بهاد “الفتح” ! حاسّين بلّي قطر نتاقمات ليهم من الغربلي باغي يفرض عليهم “القيم” ديالو عبر التلفزة و الانترنيت و النيتفليكس …
وا نتا المبارك يا راس الطّارو لي كاينة شي حاجة سميتها الغرب و قيم الغرب ! علاش شكون جاب ليك المساواة و العدل و التسامح و الأخوة و المواطنة من غير الغرب ؟! شكون حيد العبودية ؟ الغرب ! شكون دخّل العيالات يقراو ؟ الغرب ! شكون شجّع الطب و البحث العلمي تامابقاش كاياكلك فيك الگراد ؟ الغرب! شكون بنا ليك الطرقان و السبيطارات و المدارس و الادارات ؟ الغرب !
نتا المبارك لي كاين الغرب و لي كاينين قيم الغرب! علاه فاش كاتبغي تحسّن المستوى المعيشي ديالك ؟ فين كاتحرگ ؟ لمصر و لا لافغانستان ؟ و لا لموريتانيا ؟ ياك كاتحرگ للغرب! و فاش كايبغيو المسؤولين ديالك يدّاواو و الاغنياء و نتا نيت فاش كايمسّك عليك الله فين كاتمشي ؟ الغرب ! فاش كاتبغي اللقاح د كورونا شكون كايصنعو ليك ؟ الغرب !
الغرب المتقدم ! الغرب القوي ! الغرب الانساني لي كايعطيك الامكانية تحتافل وسط الشونزيليزي بالفوز د المنتخب ديالك ! وا تخايل معايا شي نهار يلعب الكاميرون ضد المغرب والكاميرون يطحن المغرب و ينوضوالجالية الكاميرونية يحتافلو بالفوز حدا الكرة الارضية فكازا ؟ آ و الله تاتنوض الگيرّة !
الغرب لي كون ماكانش و كون ماحيدش العبودية و منعها بقوة القانون كورّاك دابا كاتباع فشي سوق د النخاسة فمراكش و لا سجلماسة لي جا يتلمس ليك على قلاويك يشوفك واش مازال كاينين و لا حيدهم ليك سيدك ! و يعبّز فبزازل مراتك يشوفها واش تصلاح جارية و لا ماتصلاحش !
قاليك هنيئا لقطر بتنظيم مونديال بعيدا عن “قيم الغرب ” آ تّا سير نتا و قطر شللو فمكم بالسمن و العسل قبل مادويو على الغرب و قيم الغرب.
واااعر عليكم الغرب!
إقرأ الخبر من مصدره
