محمد سقراط-كود///
سعد المجرد حسب الدعاوي المرفوعة عليه ماشي غير واحد كان سكران ومغبر ومعاه درية ناض سلخها، بل هو مغتصب بالتسلسل السيد عندو دعاوي كثيرة على نفس الموشكيل وهو العصى وممارسة الجنس بالإكراه، إييه مشهور وبوكوص وعندو الفلوس وأي وحدة تتمناه إلى آخره من داك الكاسيطة ديال بنادم أحادي الخلية، راه لي مغتصب معندوش مع لي كتجي بالخاطر راه الهوس الجنسي ديالو هو في العصى والإكراه والإذلال، كاين واحد الكتاب سميتو الجنس والشباب الذكي ديال المفكر كولن ولسون كيعاود فيه عل واحد خونا كان ساكن في أوطيل وجارتو واحد السيدة زوينة وديما سامر عليها وكيحضيها وهي عاقت بيه وكان عاجبها ولكن هو كان باغي يغتاصبها واحد اللقطة حل عليها الباب ودخل مدرم صحة لقاها واجدة وباغا وكتسناه فمقدرش يقيم حيت هو مغتصب والجنس بالنسبية ليه لا يتحقق إلا بالاكراه وبالعصى والتجنديخ بحال سعد مايديرهاش.
ولكن للأسف فاش كتشوف بنادم كبير وواعي ومثقف وبعقلو ومتضامن مع مغتصب بالتسلسل مرفوعة عليه عدى دعاوى وتابعينو شلا قضايا في تلاتة ديال القارات، خونا موزع جبهات القتال نابليون في أياماتوا ومادارش هادشي في تلاتة دالقارات سعد المجرد دارها، ميريكان وإفريقيا وأوروبا كلها كتشكى وفيها ضحايا وأخيرا تحكم بسباب وحدة فيهم، ومع ذلك كتلقى بنادم كبير في العمر وداير راسو قافز وعايق بالمؤامرات العالمية التي تحاك ضد الأمة، لاواه كاع المشاكل لي عندنا مع فرنسا غادي يمشي ضحيتها المجرد، علما أن المجرد معتارف في المحكمة بأنه سكر وغبر وسلخ وغتاصب غير هو تضرع بأنه مخشاهش فيها، السيد معتارف في المحكمة وهنا عيالات لي ديما كيتشكاو من الرجال وتحرشهم وعنفهم اللفظي والجسدي كتلقاهم متضامنين مع سعد وقاليك محنة وتدوز وبقاو فيهم واليديه.
نقدر نتفهم راجل يدافع على سعد المجرد وهو مدان بالإغتصاب وباقا تابعاه دعوة خرى، ولكن تدافع عليه مرأة لي من المفترض تتفهم الضحية وتتعاطف معاها فهادي فشكل خصوصا من عند نساء مثقفات زعمة وواعيات، أما الفنانات هادوك لا هدرة عليهم غير تابعين جيلالة بالنافخ وماشي من المفروض أنه تكون عندهم أراء ومواقف منطقية، ولكن واحد بحال رشيد الوالي كيقول للمجرد حنا معاك منذ البداية كأنه معركة الحق ضد الباطل، واش رشيد الوالي كون كان سعد شد شي وحدة من عائلتو وسلخها واعتدى عليها جنسيا واش كان غادي يتعاطف معاه ويقوليه داك الهدرة ديال المغاربة كلهم معاك وماتسوقش للشامتين، ولكن لأن الضحية أجنبية وتضرب الطاسة وتشطح في المراقص فهانية تستاهل أو راها غير نصابة، ولنفرض هادي كانت نصابة وديال ميريكان وديال تونس والمغرب ولخرى نيت في فرنسا، والمغاربة ماشي كلهم مع مغتصب مدان جاب الله لازال بعض العقلاء في هاد البلاد مثل طاقم موقع كود.
