كود سبور//
نجح الرجاء الرياضي فتحقيق رباح مهم على سيمبا التنزاني اليوم السبت فدار السلام بقلب تنزانيا، فماتش بطولي فالجولة 2 من ليكروب عصبة أبطال إفريقيا لكرة القدم.
وسالا الماتش ما بين الرجاء الرياضي وسيمبا التنزاني اللي تحلف الناطق الرسمي ديالهم أحمد علي بأنهم غيذبحو الخضرا بالماتش، بنتيجة 3 لزيرو فتيران الناسيونال قدام 60 ألف مشجع تنزاني وكانوا حتى المشجعين الرجاويين حاضرين.
هدف الرجاء الأول ماركاه حمزة خابا فالدقيقة 30 من الماتش، وجا من بعد واحد الهجمة فيها تيكيتاكا زوينة ديال اللاعبين الرجاويين سالاها خابا بفراب واعر فالشبكة ديال سيمبا، وقدرت الخضرا تحافظ على النتجية حتى اللاحظات الأخيرة من الماتش وضرب لها البديل سفيان بنجديدة الهدف الثاني من بعد أسيست واعر من محمد مكعازي وكان هدف عالمي، وجاب يسري بوزوق بلانتي حولو بنجاح إسماعيل مقدم إلى هدف ثالث للفريق المغربي، واخا الحكم حرم الفريق من ضربة جزاء واحدة على الاقل فاللقاء.
الرجاء الرياضي بهذا الرباح كيكون حقق الفوز الثاني على التوالي ودابا كيتصدر الفريق دابا بوحدو لكروب 3 برصيد 6 النقاط، متبوع بحوريا كوناكري الغيني اللي عندو 4 النقاط، وكيجي فايبرس الاوغندي ثالث برصيد نقطة واحدة، ثم فريق سيمبا التنزاني فالمركز الأخيرة بزيرو بوان.
