كود طنجة//
الجمع العام الاستثنائي اللي كان كلشي معول عليه لحل أزمة اتحاد طنجة، صدق هو براسو طايح فأزمة.. علاش؟ ! حيث الفلوس اللي كانت شحال من جهة قالت ها هي موجودة باش يبدا الرئيس الجاي خدمتو ما بانتش، وحتى حد ما قدر يتقدم لتحمل المسؤولية.
هادشي خلا المنخرطين في الجمع العام الاستثنائي اللي ترأسو عبد السلام بلقشور البارح، ما يتافقو على حتى حاجة ويخليو الجمع في حالة انعقاد لمدة أربعة أيام، ونهار الأحد الجاي غادي يعاودو يتلاقاو، ودارو المنخرط أنس الوسيني رئيس للجنة التحضيرية لاستكمال الأشغال.
أبرشان اللي كان من المنتظر يتختار رئيس للاتحاد، بعدما تم التوافق على ذلك في الاجتماع للي كانت “كَود” جابت لكم تفاصيلو كاملة، ما حضرش للجمع العام الاستثنائي، والسبب حسب مصادر “كود” هو أنه ما بغى يدير حتى حاجة حتى يكون المبلغ المتفق عليه محطوط، باش يقدر يخلص الصاليرات ويدير الانتدابات، وباش يبين حسن النية ديالو وبلي ما رجعش للور حط شيك بالمبلغ لي كان وعد به ولي القيمة ديالو خمسة الملايين ديال الدرهم تضيف مصادر “كود”.. وهو دبا كيتسنى الجهات الأخرى توفي بوعودها.. حيث هو كيقول بلي ما يقدرش يشد الفريق وما يدير والو، حيث حتى حد ما غادي يرحمو.
أكثر من ذلك مصادر “كَود” قالت بلي أبرشان كان بدا في الخدمة وجاب لعابة مزيانين وشد لهم في فندق مشهور بالمدينة في انتظار الجمع العام الاستثنائي، لكن مللي الفلوس ما بانت حبس، وراه باقي كيتسنى، حيث أزمة الاتحاد ما غاداش تتحل بالنية الحسنة بوحدها ولكن خاص معها فلوس تحل المشاكل العاجلة ديال الفريق.
نتائج الجمع العام ديال اليوم صدمات الرأي العام الطنجي، للي كيتمنى من كل الجهات تتحمل مسؤوليتها وما تخلاش على الفريق، وتعاون الرئيس المقبل في مهامه اللي ان للي وقع اليوم كيخلي كلشي يرجع اللور، حيث ما كاينش لي غادي يقبل يشد فريق غارق في المشاكل وعندو غير الوعود.. والكرة الأن في ملعب المجالس المنتخبة والمستشهرين والمنعشين العقاريين باش يبانو رجالة كيف ما قلنا عليهم في مقال سابق ويوفيو بالوعود ديالهم!!
رئيس الجهة ما وفاش بعدهو معاه عمدة المدينة وشي رؤساء جماعات٬ اما هادوك اللي جامعين العقار والصيد بحال بنجلون فحتى باش وعد فرقة مدينتو قليل بزاف وهاداك لقليل ما حطوش.
دابا خاص الجماهير الطنجاوية تحتج على اللي ما بغاوش لحد الان يعتقو “الاتحاد”.
