احمد الطيب كود الرباط//
عبد اللطيف وهبي، وزير العدل، لي مبقاش عندو سند ولا دعم من المكتب السياسي لحزبو البام، دار خرجة اعلامية قبل من افتتاح الدورة الخريفية من السنة الثانية للبرلمان، خرجة فإذاعة محلية مكيسمع ليها حد. باش يهضر على التعديل الحكومي وأمور كتخص الحزب والحكومة.
فالوقت لي وزراء البام قررو ميهضرو للاعلام حتا يدوز المجلس الوزاري لي غادي يترأسو الملك، احتراما لهاد الاجتماع المهم بزاف لبلادنا وسياستها ووضعيتها الاقتصادية، خصوصا وانه غايدوز فيه مشروع قانون الميزانية، اضافة الى السياق لي كتعيش فالمملكة من حروب دبلوماسية وتداعيات الازمة الاقتصادية.
وهبي تحدا تقليد كيعرفوه السياسيين، ومشا لإذاعة محلية حتا حد مكيسمعش ليها. قال بلي التعديل الحكومي مكاينش. التعديل ماشي شأن وهبي. راه شأن ملكي.
وأضاف وهبي فديك الاذاعة بلي “التعديل الحكومي مجرد حلم عند البعض، وليس لديه أي صلة بالحقيقة”، وشدد “لا أحد سيخرجنا من الحكومة إلا إن قرر رئيس الحكومة أن يستقيل، أو قرر الملك حل الحكومة”.
وقال كذلك :”لم يتحدث معي أخنوش في موضوع التعديل، ولم يطرحه لا رئيس الحكومة ولا أي أحد آخر”.
وهبي كيسبق كولشي. سيدنا عاد رجع من فرنسا وبان لبارح فأول نشاط رسمي فاحتفالات المولد النبوي، وقريب يترأس المجلس الوزاري. فحين وهبي فهاد اللحظة مشا دار حوار ودار مواقف بلا اذن المكتب السياسي.
وزراء البام رفضو يديرو حوارات حتا يدوز المجلس الوزاري، لي هي مناسبة مهمة بزاف.
وهبي دارت تصريحات كعات قيادات البام، خصوصا فاش هضر على التعديل الحكومي لي ماشي من اختصاصو.
ولي زاد الطينة بلة، هو عودة وهبي لقضية وفاة السياسي البعمراني عبد الوهاب بلفقيه، وقال بأن “واحد نهار نعرفو التاريخ .. غاتجي واحد الوقت غاتحدد المسؤولية ديال كل واحد”. هادشي غضب كثر أنصار بلفقيه وبرلمانيين ومنتخبين من جهة كلميم وادنون، لي باقي كيرفضو البام بالجهة بسباب وهبي.
هاد وهبي بلاصت مايقابل الملفات لي عندو فوزارة العدل، خصوصا مشروع القانون الجنائي لي تسبب فمشاكل كثيرة للمغاربة والمستثمرين الاجانب والسياح، حيث فيه مواد رجعية متخلفة، وباقي مبغاش هاد الوزير يدير مجهود باش يخرجو. غير عجزك على تمرير هاد القانون تستحق عليها الاعفاء.
اضافة إلى غضب قيادات البام عليه، بسبب سوء تدبيره للانتخابات الجزئية والتحالفات والمفاوضات مع الاغلبية الحكومية، وهبي كيعيش تناقضات كثيرة فتصريحاتو الاعلامية.
وهبي كيعتاقد باللي باش ترسل مبعوث للملك لدول عربية راه صافي قطع الواد ونشفو رجليه. راه رسلوك لان الجزائر رسلات وزير العدل ديالها. هادا ما كان. علاش كيدير قراءة فهاد الشي.
إقرأ الخبر من مصدره
