كود – وكالات//
فقرار مفاجئ ، حكم قاضٍ فدرالي فأمريكا اليوم الجمعة , بوقف سياسة ديال البنتاغون كانت كتقيّد خدمة الصحافيين وكتحدّ من الوصول ديالهم للمعلومة.
وحسب ما أفادت وكالة فرانس برس، جا هاد الحكم من بعد طعن دارتو The New York Times Company فدجنبر، فين اعتابر القاضي أن هاد الإجراءات كتخالف الدستور الأميركي، خاصة التعديل الأول اللي كيضمن حرية التعبير والصحافة.
وكانت وزارة الدفاع فرضات، فشهر أكتوبر، تعليمات صارمة على الصحافيين، كتمنعهم من طلب أو نشر بعض المعلومات بلا ترخيص مسبق، مع التهديد بسحب الاعتماد المهني ديالهم، وهو الشي اللي خلق موجة انتقادات كبيرة داخل وخارج الولايات المتحدة.
فالتعليل ديالو، أكد القاضي أن الأمن القومي مهم، ولكن ما يمكنش يكون مبرر باش يتم تقييد حرية الصحافة، مشدداً على أن وجود إعلام حر كيبقى ضروري باش المواطن يكون على اطلاع ويكوّن الرأي ديالو.
وقرر كذلك يرجّع الاعتمادات لعدد من صحافيي نيويورك تايمز، اللي تحيدو منهم فإطار هاد السياسة.
من جهتها، رحّبات رابطة صحافيي البنتاغون بالقرار، واعتبراتو خطوة كبيرة فصالح حرية الإعلام.