Étiquette : رجال

محمد سقراط-كود///

بزاف ديال الشباب والشابات المغاربة لي عندهم أسر أو لي غير بوحدهم كتلقاهم متقلين بالمصروف على واليدهم، كيكون الواحد عندو صالير بسيط وغير مقاتل مع الوقت وحتى هو عندو آمال وباغي غير يعيش مرتاح شوية ولكن كتلقاه مكتلف بواليديه هوما ينتفوا من جيه والحياة تنتف من جيه وهادشي على حساب راسو وأسرتو، شحال من واحد كتلقاه كيشد مثلا 5000 درهم كيسيفط لواليده منها على الأقل ألف درهم للشهر، أما البنات كاين لي مستعبدينهم واليديهم كتلقى أغلب صاليرها كيمشي غير على واليديها حتى تزوج، وكاين حتى ملي كتزوج كتبقى تصرف صاليرها على واليديها وتسنى الراجل يصرف عليها عوض يتعاونوا على الزمان بجوج ويشوفوا حياتهم كأفراد ويلبيو إحتياجاتهم، وكتلقاهم حارمين ولادهم لي ولدوهم بإختيار منهم من حاجات مهمة باش يسيفطوا الفلوس لواليدهم لي ولدوهم بلا مايتشاورو معاهم بلا مايقدموا ليهم حتى شي حاجة في هاد الحياة، الخبز وأتاي والدواز والمرقة ديال الدجاج والخضرة والليالي تدوز بالقطنية والسلاخي ديال العصلا وتشيار بالصنادل والتصرفيق والضرب والغوت راه ماشي حاجة لي خاص يجازي الواحد واليديه عليها أو دين في رقبتوا خاصو يردو ليهم شي نهار.

هادشي كامل بإسم رضاة الواليدين كتلقى أسر فتية كتشتت والأطفال كيضيعو حيت أحد الأزواج عندو إلتزام مع واليديه خاصو يصرف عليهم، حقا هوما ولدوه وتكرفصوا وتعذبوا عليه، ولكن أنك تجيب إنسان في هاد الحياة باش يكون هو التقاعد ديالك هادي راه أنانية ونوع من العبودية المبررة برضاة الواليدين، خاص الأباء يكونوا مستقلين على ولادهم ودارين في حياتهم علاش يرجعوا والى ماقدروش مايولدوش، علاش الواحد يكون غارق فيلا البؤس ويزد يجيب زوج أو زوجة يكرفصهم معاه وفاش يكبرو خاصو يجازيهم على هاد الجريمة، علما أنهم ماشي كيكبروهم رجال أعمال وأطباء ومهندسين وكيساعدوهم عبر التعليم أو طرق أخرى أنهم يترقاو اجتماعيا باش يجي واحد الوقت يردو ليهم غير شوية، هاد الحالات كاينين ديال أباء مكافحين مناضلين ديال بصح تقطعوا على ولادهم باش كبروهم وقراوهم وضحاو من أجلهم، ولكن هادو قلال بزاف الأغلبية بحال لي كيلوح الزريعة في البلاد البور وكيبقى يتسنى الشتا.

كنت كنعرف حالات ديال أطفال صغار عندهم خمسنين وست سنين واليديهم من مناطق نائية نواحي إيجوكاك ونواحي أزيلال كيسيفطوهم يسرحو في الرحامنة عند ناس حتى هوما فقراء ولكن على الأقل يقدرو يخلصو 200 درهم في الشهر أو 300 مقابل خدمات الطفل لي كيكبر معاهم في الدار، علما أنه ماعمرو كيشوف هاد الفلوس كي دايرة حيت كيجي السمسار كيجمع الفلوس من بزاف ديال الناس في القبيلة ويديهم للمنطقة منين جاب الدراري، وهادو نيت وبحال حتى فاش كيكبرو كيخدمو في البني أو أي خدمة ديال تمارة وكتلقاه جزء كبير من مدخولو خاص يسيفطو لواليديه لي كيتسالوه في هاد الحياة فقط أنهم ولدوه، وهادشي عاطينا جيل ديال الشباب ولاد الشعب ماقادرينش يزيدو في الحياة لأنهم مكبلين بأغلال رضاة الواليدين، بينما ولاد لي لاباس عليهم واليديهم لي مرضيين معاهم كيبقاو يدفعوا في ولادهم ويعاونوهم حتى يوصلو لبر الأمان على عكس المزاليط ولادهم غارقين وكيزيدو يغرقوهم.

إقرأ الخبر من مصدره

محمد سقراط-كود///

واحد من أبطال كورونا المهمين ولي كانوا في الصفوف الأمامية في مواجهة الفيروس القاتل أنذاك هو مول الحانوت، ولكن للأسف لم يتم تقدير بطولته أو الحديث عنها بل العكس في أيام كورونا كان مول الحانوت ديما ضحية لرجال السلطة ولتطبيق البعض منهم بهلوانيات مبالغ فيها للحد من إنتشار فيروس كورونا، كان هو اللول لي كيخرج فيه السربيس، فين ماتخرج شي لجنة تدور كتبدى من مول الحانوت واش داير الكمامة واش داير الليكات ومعقم الفلوس واش مانع الناس يدخلوا للحانوت واش معقم الحانوت واتش مسيق الباب واش دوشتي للطريق لي قبالت الحانوت بجافيل شحال ستهلكتي ديال سانيكرا من نهار بدا الحجر الصحي، دخل السلعة ماتخرجهاش خرج الكليان مادخلوش، الى غيره من الأوامر المفهومة ولي غير زايدة وإجتهاد من اللجان المكلفة ومن رجال السلطة وأعوانهم.

حاليا قررات الداخلية تخرج تظبط الأمور في الأسواق وطبعا بدات من مول الحانوت والبياع والشراي حيت هو الحلقة الأضعف والثابتة فوقاش ماخرجتي تلقاه حال حانوتوا وكيترزق الله وأراك للتصاور والسرابس والقايد والقايدة والمقدم والشيخ والبلانطوات وصحاب الإنعاش وجوقة دالباشار باش يشوفوا مول الحانوت واش زايد درهم ولا عشرة وشحال كيربح في كل منتوج، وهوما كيشوفوا بعينيهم أن الحوانت قريب يوليو كثر من المستهلكين وكل حانوت حلو جنبو تلاتة وربعة خريين، دايرين نفس الديكور نفس الباش نفس التستيفة ديال السلعة نفس السلعة نيت، ومهبطين الثمن للضص وخدامين على الشركات وصحاب والسلعة آشمن زيادة لي غادي يزيدو وهوما الى زاد واحر عشرة دريال كتدوز عند لي حداه تلقاه ناقصاها وتقضي غاراض، هادشي بلا منهدرو على المنافسة ديال الأسواق الكبرى والصغرى حاليا، ها بين فاتح في كل زنقة ودابا تزادهم كارفور ماركت وكارفور اكسبرس ومرجان ماركت وصحاب الهري وصحاب سلعة الشمال المعشرة، تافين غادي يزيد هاد مول الحانوت مسكين وآش غادي يزيد.

السمطة طويلة بين الفلاح أوة الصانع ديال المنتوج وبين المستهلك هاد السمطة عامرة بالسمسارة والمستغلين لي معندهمش أماكن محددة فين يقدر يوقف عليهم القايد ويسولهم، كاين لي غير بالتيليفون والقهوة خدام وقاضي غاراض وداير الفلوس ديال بصح مايهز مايحط مايلوح زريعة مايشد لما مايقابل خدامة يتسنى الفلاح حتى يدير كولشي ويشري عليه الجنان فيد الله باقي حتى مانبث ويبيع لواحد آخر وهكذا دواليك ، وطبعا هادو فين غادي تشوفهم القايدة باش تجيب المقدمية والمخازنية وتوقف عليهم وتبين فيهم السربيس، كيبقى مول الحانوت الدرويش هو لي في الواجهة ديال أي سربيس، نهار يسكر شي حد في الحومة كيقصد مول الحانوت يعربط عليه وياخد فابور، نهار البراهش كيبغيو يشفرو أول مرة كيبداو من مول الحانوت، بلا منهدرو على لي سالتين بالكريدي وهادو أرباب أسر بعقلهم، وطبعا نهار كتخرج شي لجنة أو القايد والقايدة راه كيبداو من مول الحانوت يشوفوه واش كيبيع بيدو ديال لما لي مكتوب فيه الثمن بداك الثمن نيت.

إقرأ الخبر من مصدره