Auteur/autrice : كود

سهام البارودي- كود//

في الوقت لي العيالات فدول فحال إيران و افغانستان كايتقتلو بسبب الحجاب ! حسب واحد الدراسة جديدة دارها مكتب سينيرجيا بشراكة مع ليكونوميست ! قاليك آ سيدي 65% ديال المغاربة كايشوفو بلي “خاصّ” و كانسطر على كلمة “خاص ” العيالات يلبسو الحجاب ! و النسبة كاتطلع ل 75% فالشمال و الشرق ! يعني فالشمال مثلا لاخديتي ربعة د الناس ، ثلاتة منهم كايشوفو انه المرا خاصها تلبس الحجاب !

مصيبة كحلة هادي ! مصيبة للحرية و مصيبة لحقوق المرأة فالمغرب باش نلقاو الاغلبية مع “اجبارية” ارتداء الزّيف ! يعني كون ماكانش القانون و كون كنا فشي دولة من غير المغرب كورّا العيالات بزز منهم كايلبسو الزّيف ! و كورّا تاحنا كايموتو عندنا العيالات لي رافضين هاد المسألة ! واخا راه دابا نّيت بزاف ديال العيالات دايرين الزّيف مضطرات ماشي حيت باغينو ! كاتلقاها مفروض عليها من طرف الواليدين، عايشة فشي حومة شعبية و لا شي كاريان ضروري تغطي راسها باش يعطيوها التيقار…

مصيبة كحلة و كارثة ! كاتزيد تأكد ليا انا شخصيا انه الحمد لله على نعمة المخزن لي واخا له ما له و عليه ما عليه و لكن للعيالات بعدا راه درع مهم كايحميهم من المجتمع براسو لي مازال ماناضجش و ماواعيش بمفاهيم فحال الحرية و الحقوق و المساواة !

هادشي علاش الضوسي ديال المرأة مكلف بيه الملك ! حيت كون بقا فيد الأحزاب السياسية المغربية كورّا البعابع لاخدات المرا شي حق من حقوقها و كورّا حنا مازال كاناكلو تاكايساليو الرجال كانكدّو العظومة ! شكون هوا هاد الحزب السياسي لي عندو الجرأة يدافع على المرأة و يجيب شي مشروع كبير فحال المدونة لي جاب الملك ؟ حتى واحد طبعا ! كلهم ماغايبغيوش يخسرو الأصوات ديال هاد المجتمع لي كايشوف بلي “خاص” المرا تلبس الزّيف !

ولكن هادشي ماكايمنع أنه هاد الأرقام كاتخلع ! ارقام كاتبين أنه الشعب مازال مسيطرة عليه الافكار القروسطية و بعيد كل البعد على الحداثة.

بالعربية تاعرابت ! الشعب ماباغيش المرا تتحرر و تحرر الجسد ديالها ! باغيها دير الزّيف و “تستر” و تسد فمها و ماطالب بحتى زفتة، تاكل القوت و تسنى الموت.

إقرأ الخبر من مصدره

محمد سقراط-كود///

القاسم المشترك بين أغلب حوادث التسمم بالكحول لي ماتوا فيها المغاربة هو وقوعها في مدن مافيهاش بيسري ديال الشراب بحال العروي والحاجب والقصر الكبير ولا قدر الله مستقبلا تقدر توقع في الشاون الى بقات بلا بيسري وفي بن حمد وبوعرفة وفيكيك وبوذنيب وإيموزار كندر والعديد من مدن المغرب المهددة كل ليوم بمأساة موت جماعي بسباب الشراب المسموم يمكن تجنبه بالترخيص لمحل ديال الشراب كيبيع سلعة مراقبة من طرف الدولة وصالحة للإستهلاك، ولكن لأنه شراب وما يمثله عند عقلية ما بعد المد الوهابي والصحوة الإسلامية فراه لحد الآن بحال الى واقع هادشي لشي ناس خريين ماشي مغاربة واحد حالة صمت عجيبة بل كاين تشفي ديال ها طريق الشراب فين كتوصل.

شهداء ماحيا بالقصر الكبير راه بحالهم بحال المغاربة لي ماتوا بالتدافع في مكة فاش كانو كيحجو وبحالهم بحال أي ضحايا للكوارث العديدة لي وقعات للمغاربة ولي كانت الدولة كتحمل مسؤولية كبيرة فيها، بحال النسا لي غرقوا في معمل طنجة وبحال ضحايا حريق معمل ليساسفة، راهم مغاربة عندهم حقوق مكفولة ومن حقهم يشربوا ويسكروا ويتقداو شراب مزيان ومراقب ومايبقاوش عرضة لسسموم لي كيبيعو الكرابة، تخايل معايا هادي غير محلبة أيور في كازا كتبيع غير العصير والبيض والجبن والفطورات ولقاوها خانزة عامرة زق ديال الفيران وسراق زيت، ماحساك بكراب كيقطر ماحية في ظروف أبعد مايكون على الإنسانية راه كيديرو فيها الزيزوارات وشي عجب كاع مكيتذكر وشي غبرة وشي عجاج والدولة كتفرج في ولادها كيموتوا.

المغرب بلد منتج للشراب وخاص يولي رائد في المنطقة نظرا للجو المعتدل والأراضي الخصبة، ومع ذلك داير شروط وقيود معقدة على مواطنيه وراخيها للأجنبي، الطاسة كمشروب وسلوك احتفالي كيجلب السعادة وكينشط في المغرب تحول لنشاط قاتل جماعي، وقبل مايكون قاتل راه كيمرض بالغلى وبصعوبة الحصول عليه وبالطريقة باش كتشري وتتقدى ونتا عرضة للإبتزاز والشفرة والجقير، وهادشي كامل على ود قوانين خاص المغرب يتجاوزها ويفوتها.

إقرأ الخبر من مصدره