اسماء غربي- كود//
واحد الظاهرة غريبة في المغرب، هو أننا كنلقاو أولاد السياسيين والنقابيين كيورثو باواتهوم في كل المناصب السياسية والانتخابية، بحال البرلمان، والجماعة، ولكن مكنلقاوهومش كيورثوهوم فرئاسة الحزب.
حزب الاستقلال لي هو بات الأحزاب المغربية، ومقدرش زيي علال يورث ولادو، واخا ورث نسابو، حتى سي عبد الواحد الفاسي مسكين فاش بغا بطلع رئيس ديال حزب العائلة، دار ليه حميد شباط نوض ونوض، واخا حميد ما فاسي ما مراكشي، وأصلو من الجبل، وهو براسو مقدرش يورث ولادو الحزب، واخا ذخلوم كورجة للبرلمان والجماعة.
وحتى فاش مات زدي علال، وجات النوبة ديال المراكشيين لرئاسة الحزب، مقدرس سي امحمد بوستة يبلاصي ولدو من بعدو، واخا وصلو للجنة التنفيذية للحزب، ورجع الأمانة للفاميلة ديال زدي علال، ولكن ماشي للولد، بل لراجل البنت، حتى جا حميد شباط وبغا ينتقم للعائلات غير الفاسية والمراكشية، ولكن دوماج مطولش، وجا الجبلي بركة نسيب الفاسي، وغالبا غيخليها من بعدو لصحراوة.
المهم حتى ولد ما قدر يورث باه في حزب مبني أصلا على الفاميلات.
وهو نفس الشي لي طرا في الاتحاد الاشتراكي، علي بوعبيد مقدرش يورث سي عبد الرحيم، واخا شي وحدين جابوه باش زعماكينا يحيد اليازغي، ولكن الشاب علي خلا الحزب، ومشا ينظر، مقدرش على مناورات الاتحاديين لي مضيين، واليازغي براسو فشل أنه يخلي ولدو علي يورثو، واخا وصلو لرئاسة الشبيبة الاتحادية، وفي الأخير جا لشكر دار التسييقة للأب والإبن.
البواجدة جاو معطلين للسياسة، ولكن فهمو الدرس، فلا بنكيران ولا العثماني خلاو ولادهوم أصلا تكون عندوم مناصب قيادية في الحزب، وسدو هاد الباب، مشاو قراو ولادهوم، وغيدبرو ليهوم مناصب في مؤسسات عمومية أو شركات ديال دوماليين صحابهوم، وكفى المومنين شر التقاتيل على رئاسة حزب، خصوصا والليستة طويلة ديال المنتظرين.
حتى الأحزاب لي كانت كتسمى الإدارية ولي عامرة عائلات في البرلمان والجماعات، الزعماء ديال هاد الأحزاب صاوبو لولادهوم الأتوروت نحو المناصب وإيقارضن، ولكن بعيد على صداع رئاسة الحزب، حتى الحركة الشعبية كيرأسها دابا نسيب حليمة لي سميتو أوزين، ولي ماشي هو أوزين الأول لي هو ولد أحرضان المؤسس.
عصمان لي كان نسيب الحسن الثاني وفهم بكري أن ولي العهد كاين غير في ولاية العرش، وما يمكنش يكون في الأحزاب.
الوحيد لي ورث الحزب لولدو هو عرشان، ولكن هانيتون حيت أصلا ديك الحزب معروف باسم حزب عرشان، أكثر من الحركة الاجتماعية الديموقراطية.
المرحوم علي يعثة، ولادو كانو شادين الجريدة لي كانت أقوى من الحزب فواحد الوقت، بحيث كان عدد لي كيقراو البيان الفرنسية أكثر ملي كيصوتو على حزب الشيوعيين، وواخا هاكاك فاش مات مشا الحزب لمولاي إسماعيل العلوي، ومن بعدو نبيل بنعبد الله لي باقي ملقاش لمن يدوز الأمانة.
في الأحزاب لي كاينة دابا، كندويو على الأحزاب المعروفة، كل الأمناء العامين معندومش ولادهوم في المكاتب السياسية، باستثناء الاتحاد الاشتراكي، وغيخرج اجريس على بنتو إذا كان كيفكر يدوز ليها الحزب، حيت فترشيحو للولاية الثالثة وعد الاتحاديين باش يكون أمين عام الجميع حتى الغاضبين، ماشي أمين عام الفاميلة، غير غيزيد غاضبين على غاضبين.
دابا نرجعو لسؤال: علاش الولد أو البنت مكيبلاصيوش باهوم فرئاسة الحزب في المغرب؟
ببساطة حيت المغاربة كيبغيو ملك واحد، هو لي حاكم البلاد، ومكيبغيوش ملوك في أحزابهم. وفاش كيبغي شي حد يقلد الملك مكيحملوهش، واخا يقلدو غير فذبح الأضحية أو طريقة الاستقبال.
إقرأ الخبر من مصدره
