Étiquette : الاطفال

سهام البارودي – كود//

البارح وانا كانشوف فالناس فالميترو فباريس هازين الورد و الكادويات و القراعي د الشراب قلت مع راسي وا سمعني ! هذا هوا عيد الحب و الا فلا ! راجل بموسطاشو طويل عريض و هاز بوكي د فلوغ طالع بيه للميترو و غادي بيه فالزنقة تاواحد ماكايشوف فيه تاواحد ماكايضحك عليه تاواحد ماغايقول عليه عنيبة ! ماكذبوش ملي قالو على باريس عاصمة الحب حيت بصح عاصمة الحب و مظاهر الحب ! الناس متصالحين مع راسهم و مع مشاعرهم، ماكايحشموش من الحب ، كايوجدو ليه و كايخططو ليه و كايعطيوه وقتو باش يحتافلو بيه على حقو و طريقو و خليني من ديك الهضرة ديال “حنا الحب كانعيشوه كل نهار ماشي غي نهار واحد فالعام” الهضرة د المكاريب ! المكاريه ! كارهي الحب و الحياة لي ماكايرضاوش يتعلمو من اسيادهم فنون الحب.

وا عاوتاني فاش كاتشوف راه جات معاهم يحتافلو بالحب ! كلشي هنا كايساند الحب من الواليدين و نتا طالع، المدرسة، الزنقة، المجتمع حتى القانون هنا فصف الحب ! كايقوليك علاقة “رضائية” يعني بنادم باغي و بنادمة باغية الله يسهل عليهم ! الواليدين هنا كاتلقا ولدو صغيور و كايسولو واش عندك “حبيبة” فالمدرسة ؟ حيت عارفين الحب كاين فينا و كايكبر معانا و ماشي حيت صغار راه ماكانحبوش ! الاطفال كايعيشو الحب، المراهقين كايعيشو الحب كاتلقاه عندو حبيبتو كايبغيها و كاتبغيه ، كايجي عندها لدارهم كاتمشي عندو لدارو كايسافرو مع الاصدقاء ديالهم … كايعيشو الحب ديال السن ديالهم و كلشي كايشجعهم عليه ! حنا المراهقين ديالنا مساكن كايسمع مّو كاتقوليه ” لاتجيبش ليا شي خانزة للدار” ، الحبيبة ديالو كاتسميها مّو “خانزة” كي بغيتي يكبر ليك هاد الشاب سوي و تكون عندو علاقة سوية مع النساء و مع الحب ! غايكبر اعوج ! محروم من الحب و خايف من الحب ! يخرج معاها للبحر يوقفوه الجوندارم الخيالة شكون هاديك و يسخسخوهم و يهددوهم غايعيطو للواليدين ! الحب عندنا فالمجتمع يقابل بالاستهزاء و التنمر و الطليعة !الحبيب كايتسمى ” عنيبة” “ساحرة ليه” “موكلاه” و الحبيبة “مدلولة ” سيري دابا يتفلى عليك و يلوحك ! سيري غاياكلك لحم و يلوحك عظم ، سيري تبعيه تاتلقاي راسك حاملة و لايحاه فالطارو د الزبل ! شوف الهضرة كي دايرة ! تا شوف الرومانسية كي دايرة ! الزبل و اللحم و العظم ، قاموس ديال الگرنة ! بنادم كايكبر بعيد على الحب و مظاهر الحب !

آ سيدي و الله حتى بزاف علينا الحب ! واخا الرأسمالية كاتفرض عيد الحب بالقوة فالمغرب و كايبان ليك الطبقة المتوسطة و شي نقيلات مقاتلين باش يحيوه كما يجب و لكن الاغلبية الساحقة عايشة بعيدة على الحب، تسول المرا واش كاتبغي راجلها تخاصم عليك ” سيري لهيه ! اشمن حب يجيب ليا غا ماناكل انا و الدراري و يمشي لهلا يرجعو ” ! العام لي جا يلقانا كانغوتو على تجريم العلاقات ! الدولة براسها خاشية راسها وسط ترامي المواطينين اشمن حب بقا ليك ؟

بقا ليك غا حب الله و حب الوطن !

إقرأ الخبر من مصدره

سهام البارودي- كود//

مؤخرا شفت الڤيديو د جميلة الهوني لي كاتعاود فيه على المعاناة ديالها كأم مطلقة كاتشوف راسها محرومة من اتخاذ قرارات مهمة فحياة ولدها فحال السفر و الانتقال المدرسي علاش ؟ حيت فالمغرب واخا گاع الحوايج الزوينين لي جابتهم مدونة الاسرة مازال كاين اجحاف كبير فحق المرأة و الوصاية الشرعية كاتبقى عند الأب بوحدو ! هوا لي يقدر يقرر بوحدو فأمور كاتخص الاطفال ديالو فحال السفر و الانتقال المدرسي مثلا.

الأم المطلقة فالمغرب واخا هي لي كاتعيش فأغلب الحالات مع الدراري و كاتقابلهم و تكلف بيهم، ماعندهاش الحق تقرر فحياة ولادها، واش ماشي الظلم هذا ؟

باشمن حق الاب بوحدو لي تكون عندو هاد الوصاية ” الشرعية” ؟ واش غي حيت عندو العراوي صافي راه عندو الحق ! يعني راجل ديميسيونير مطلق المرا سامح فالاولاد ، ماباغيش يخلص النفقة كايتهرب من مسؤوليتو كأب عندو الحق أنه يقرر فانتقال مدرسي د ولدو و الأم لي معاها داك الطفل بالليل و بالنهار ماعندها فيه حتى حق ! كاتعتابر أم حاضنة ! فحالا شاريها داك الراجل باش تقابل ليه ولدو ! ولدو بوحدو طبعا حيت هوا بوحدو لي من حقو ياخد قرارات فحياة داك الطفل! فحالا المرأة غير صالحة لاتخاد قرارات ! مكلخة و لا متخلفة عقليا ؟ صالحة غي لتبدال ليكوش و الطياب

الى ماكانش هذا هوا التخلف و الظلم فا اشنو هوا التخلف و الظلم ؟

هاد القانون القروسطي خاصو يتبدل اليوم قبل غدّا ! آشمن وصاية شرعية و لا الملاوي واش حنا عايشين فالقرن جوج ؟! آ سيدي عطيو للعيالات الحاضنات يقرروا فمصير ولادهم ! شحال من وحدة اليوم كاتخضع للابتزاز من الطليق باش يسني ليها انتقال مدرسي و لا رخصة للسفر ؟!

خاص مراعاة مصلحة الطفل ! و مراعاة الدور الكبير لي كاتلعبو المرأة فحماية ديك المصلحة ! راحنا عارفين خروب بلادنا ! و عارفين مورا الطلاق شكون كايبقا حاصل فالاولاد و شكون كايعلّق !

إقرأ الخبر من مصدره

فدوى سيلينا – كود///

فالوقت اللي مظاهر الحرية كيبانو فالشارع المغربي والوقت اللي بدات القطيعة مع زمن الإسلاميين والمحافظين والعادات القديمة، باقي المجتمع المغربي مجتمع ذكوري ومطبع مع افكار الشرف والبكرة وباقية المرأة المغربية معندهاش الحق فالجسد ديالها.

غالبا الناس كيقولو صافي سالينا من المواضيع دالشرف والبكرة والناس قرات ووعات والشباب دخل للكليات والمدارس ومبقاش هادشي كياخد حيز كبير فالنقاش ولكن للأسف لا، مزال ماكاين والو من هادشي وفالحياة الواقعية البنات مزال كيعانيو بزاف لانه البنت اللي فقدات البكرة غتجيب العار والشوهة.

“كود” كيف العادة، اختارت تنبش فموضوع “البكرة” من جديد، بحيث ولا افتضاض البكرة الحل من الحلول لي كيلجؤو ليها البنات باش تنفتح على جسدها وتعيش حياتها وحريتها الجنسية ولا كتختار طرق اخرى وبديلة باش تستمتع جنسيا.

وفهاد الصدد، قالت بنت عندها 25 عام، مبغاتش تقول سميتها كاملة نظرا للأسرة ديالها المحافظة والمجتمع المغربي، بلي قصتي بدات منين كنت مزال صغيرة.
البنت كتقول :” كنت طفلة كنكتشق الجسم ديالي وصافي فحال كاع الاطفال مكنتش عارفة اصلا شنو كنت كندير ولا باللي داكشي اللي كنت كندير سميتو عادة سرية، ومكنتش عارفة حتى شناهي العادة السرية وشنو كتعني واش حرام ولالا عيب ولالا كنت طفلة وصافي مكاينش اللي يهدر معايا ولا اللي يشرح ليا مكاينش وعي ومكايناش ثقافة جنسية ولكن كاين عقاب وكاين نبذ”.

وتابعت قصتها لـ”كود” :”منين بديت كنعرف وكنبحث وكنفهم عرفت شنو درت وتما غتقلب حياتي حيث عارفة راسي فين عايشة والمجتمع اللي انا فيه حيث لا المجتمع والمحيط مؤهلين يتقبلوني ولاحتى انا براسي مؤهلة نتقبل راسي، مكان حتى شي حد ممكن نصارحو ولاشي حد ممكن يفهمني حيث الى هضرت غنشوه راسي وعائلتي، والمشكل هو اني وليت كنعيش إزدواجية، مع البنات فنقاشاتنا كنأيدهم فالرأي وان البكرة والشرف والعفة مهمين ولكن بوحدي كنت كنعاني حيث كنت كنحس براسي موسخة وناقصة وكنت كنشمأز من راسي وكنحس بالذنب وبديت نقلب على طرق بديلة وبديت نبحث على بكرة اصطناعية وناخد فكرة على الاثمنة ديالها باش نبدا نجمع”.

وأضافت :”مشا بزاف من طفولتي حيث كنت مزال موصلتش حتى ل 18عام ، مشا الوقت والطاقة وانا كنفكر فحوايج معنديش فيها لايد لارجل وانا كنكذب وكنتصنع.

واضافت قطعت اشواط باش نولي نفكر خارج السرب ونتسامح مع راسي ونعرف باللي الجسم ديالي من حقي وحتى واحد ماعندو الحق يحاسبني عليه وحتى دبا كون مدرتهاش وانا طفلة ومعارفاش كنت غنديرها دبا عن وعي وانا عارفة”.

والقصة الثانية اللي خداتها “كود” من ريمي(اسم مستعار) كتقول :”أنا بنت عندي23، اوا لحد الان مزال متعطاتنيش الفرصة نمارس الجنس كي بغيت، هادي أعوام او انا كنفكر نفض البكرة نتاعي بيديا بلا ممارسة جنسية حيت مكنتيقش فالرجل المغربي، مبغيتش نخلي شي واحد افضها ليا حيت واحد نهار ايجي ايعايرني او استفزني، او ايبقا ديما فبالي حيت هو الشخص اللي غنكون عشت معاه ديك اللحظة، هادشي علاش فكرت انني خصني نفضها لراسي او نمارس الجنس كي بغيت، ديك الساعة مغيهمنيش الا جا شي مغريبي او كالي شي كلمة خايبة”.

وأضافت ريمي لـ”كود” :”راكوم عارفين المغربي ديما كينعت البنت اللي نعس معاها ” بنت الزنقة”، هاد الكلمة مغديش تمرضني حيت اصلا انا انكون فضيت البكرة لراسي براسي. مي، مزال مقدرتش نفضها ،او ختاريت نمارس الجنس بطريقة سطحية، علاش؟ حيت كنحس براسي ممستقلاش او مهددة فالمغرب، وفالحقيقة والحرية خصها الفلوس ،وخا خدامة حاليا فالقطاع الخاص، مي نقد فأي لحظة منبقاش خدامة.
وشرحات، قبل مانخدم معمرني مارست الجنس، كنت كنتسنا نخرج من دارنا او نكمل قرايتي باش نعيش كي بغيت، او منين خدمت اول حاجة درتها، هي وليت كنمارس الجنس بطريقة سطحية. او دبا مزال كنتسنا نستقر ونزيد نستقل باش نفض البكرة نتاعي او أنا كنحس بالأمان بحال نكون مستقلة مية فلمية فشي خدمة او بروجي او نخوي المغرب”.
وتابعت سردها لقصتها مع البكرة :”صراحة ليممخلينيش نفضها دبا، هو كنقول الدنيا والزمان محساش براسي مرتاحة، خايفة من المستقبل، خايفة من المجتمع، انا دبا مكنقدش حتى نلبس اللي بغيت، اعساك نوض نفض البكرة. خفت لنبقا بلا خدمة اوا ينوضو يزوجوني، او نتوما عارفين المغريبي الا بغا اتزوج خاصو وحدة بميكتها، اوا تنقول حتى الا مطفرتوش، البكرة تقد توفر ليا واحد شوي دالامان مع شي واحد”.
ووضحات بلي :” هادشي باش دبا كنحاول نخلق كاع الفرص لتخليني نوض نفضها راسي براسي او نعيش كي بغيت، هادشي باش خاصني نستقل مزيان ولا نخوي المغرب باش ندير اللي بغيت بلا تهديد”.

إقرأ الخبر من مصدره