ماريا – مديرة مالية وام حاضنة لبنتين///
انا ام مغربية إلى النخاع ولكن مظلومة فبلادي بقوة القانون و مكرفس عليا القضاء.
احساس كبيرة ديال الحكرة و قلة الحيلة، منذ أن تكلمت الممثلة جميلة الهوني حسيت براسي اني خاسني نعاود قصتي ديال ام مغربية حرة حاضنة لبنتين بالمغرب. علاش حرة؟ حيت مورا الطلاق مسحت دموعي ونضت قابلت البنات و خدمتي و ناقشت اطروحة الدكتورة ديالي و عاودت حياتي فالحلال و خا كان تهديد ديال “نديليك ولادك الى تزوجتي”.
انا كنت متأكدة ان راجل طلقت منو حيت كيسهر كل ليلة ميقدرش على بنات على أبواب المراهقة، العادة الشهرية وزيد رزيد…
فغشت 2020 رفع عليا دعوة إسقاط الحضانة بدعوة ان راجل اجنبي كيزورني فالدار وقطع صلة الرحم. بلا مانقول انني تفاجأت و تصدمت ملي شرطة الأخلاق صيفطات ليا استدعاء، كانت صدمة كبيرة! كيفاش راجل كيطلب من البوليس يمشي يشوف شكون كيدخل عند طليقتو مع العلم انني ساكنة مع والديا.
محكمة الأسرة بعد عدة جلسات طلبات بحث، و قالت لنا القاضية “انا هنا لمصلحة الدراري و مشاكلكم ماشي شغلي”، السيدة ماتسلهاش طلبات مني حتي النتائج المدرسية و شافت بعينها الاهتمام، و فمنطوق الحكم قالت ان الاب هو اللي ماكيخلصش النفقة وتنعدم عندو الاستقامة و الأهلية للحضانة، واضافت انه يجب أن يتكلف بنصف الواجبات المدرسية لان البنات قيدهم من الاول فهاد المدرسة.
قلت الله اكبر و خا القانون المغربي ظالم الام و لكن القضاء مشا بعيد و شاف مصلحة البنات، و زواجي في كل الأحوال فات عليه عام.
ولكن فالاستناف، وبدون ادلة أخرى وفاش قال الاب انه غادي يحول البنات من الميسيون للمدرسة العمومية، قررت الهيئة تسقط عليا الحضانة بسبب قطع صلة الرحم، بجوج محاضر ديال غشث 2019 و حنا ف2022! وواخا قدمت 6 ديال المحاضر فيهم انه مكانش كيجي و بأنه غشت عطلة صيفية ….
بكيت و حقدت على القضاء و شككت فالنزاهة ديالو، و كتبت لرئيس المحكمة كنشكي ظلمي و شفتو و قلتلو انا هنا غير باش تعرف ان مستقبل هاد البنات خاصوا رعاية اكثر و بلا متاجرة.
انا التجاءت لمحكمة النقض والبنات مزال معايا، وكنشوف كيفاش اب ميجيش يشوف ولادو 4 سنين و منين يسافرو يدير 2 محاضر! و هاهو معفي من النفقة بقوة القضاء. هدا هو التحايل على الحق و القانون.
دابا البنات معايا و لكن مابقيتش عارفة كيفاش ندافع على حقوقهم، ماعنديش گرام ديال الثقة فالقضاء ديالنا! وكنتسنا بفارغ الصبر القانون الجديد.
فبلاد أخرى الاب اللي ماياخدش ولادو عام مستحيل تحم المحكمة لصالحو.. وعاد زيد عليها ماكيخلصش النفقة، اذا هذا خاص تحيدلو الحضانة و الولاية و كلشي! و لكن حنا باقين فمجتمع ذكوري فين الاب عند الحقوق و الام غير الواجبات.
سيدنا كرم الام و لكن المؤسسة القضائية باقي مكرفساها! المنطق فهاد البلاد هو: حيت هاد المرا مطلقة اذن فاشلة، و غير اهل حيت ماقدراتش تصبر للذل.
إقرأ الخبر من مصدره
