Étiquette : قهوة

محمد سقراط-كود///

أكثر سلوك عبثي يمكن تشوفوا في المغرب هو مداهمة مقاهي الشيشة والسطافيط واقفة في الباب والشباب في عمر الزهور طالعين يركبوا باش يدوزوا 48ساعة، والجوقة وبنادم كيتشفى ويتفرج ويصور وتلقى شي موقع حتى هو كيصور في المداهمة بحال إلى شدو ولد مسعودة في إياماتوا، والبوليس مخرجين القراعي دالشيشة والسرباي ومول القهوة وسير واجي وأرى عمر المحاضر وليلة ديال الخدمة، والنتيجة في اللخر غير ضيعو مول القهوة في دوك الشيشات وضيعو ليه وقتوا وقتهم وتكرفصوا على الزبناء عشاق الهوندا إس آش، والقهوة كترجع تفتح والشيشة كتعمر والباب سادة ومريضنا معندو باس حتى تجي شي حملة وحدة خرى وأراك للتصاور الموسمية عاوتاني.

القهاوي ديال الشيشة كثار في المغرب ومعروفين وخدامين طاي طاي كاين منهم لي جا قبالة الكوميسارية، وكاينين وسط المدينة وفي الأحياء الشعبية وحقا كاين لي كيتباع فيهم المخدرات وهادشي ماخافي حتى على شي مغربي، إذن لاش هاد الحملات الموسمية وقوة التصاور والبلاغات والخدمة الخاوية للبوليس والمخزن، ماشي قانوني هي ماشي قانوني يعني متكون تاوحدة حالة ولي حلات تخدم بالتخبية ديال بصح، ماشي هاد لاقانوني ديال دابا سير خدم على راسك والى جات فيك الحملة كمدها وصبر، وماشي هاد الإنتقائية في المداهمات، كتلقى شارع عامر قهاوي دالشيشة ووحدة هي لي خرج فيها البلان هادشي راه كيكرس للاعدالة، يا كولشي تجي فيه يا ماتجي في تاواحد.

وحتى المحجوز لي هو شيشة ومعسل ماصالح لوالو ماشي بحال حاجة الماكلة أو لحوايج كيتفرقوا في الخيريات وملاجئ الأيتام، قرعة دالشيشة كتقدم كمحجوز في المحكمة وكتلقى البوليس كيدورو بيها من القهوة للكوميسارية للمحكمة وحطها تما حتى يفرج الله، غاراق ديال الخدمة والجهد والوقت في الخوا الخاوي مخدمين رجال الأمن ورجال العدل والى جاب فيها مول القهوة شي شهورة يخدمو معاهم حتى ادارة السجون على ود آش الشيشة، آش الشيشة مضرة بالصحة بحالها بحال السكر والطحين والزيت لي كيفرقوا في المساعدات الغذائية وبحال الكارو والشراب لي كيتباعوا عادي، هذا ماشي دفاع على واحد الحاجة ضارة ولكن دفاع على الحد من السلوكات العبثية ديال منفذي القانون وهاد المداهمات الشكلية لي مانافعة بوالو هاهو المغرب كلو قهاوي دالشيشة، فاس مثلا فين ماتبان ليك شي قهوة بابها مسدود وقبالتها موطور دالشينوا واقف عرفها قهوة دالشيشا والبعض منهم راه محلات واعرة في المناطق الراقية ديال المدينة وعارفهم كولشي إذن لاش هاد داهمنا لهيه وهنا لا.

إقرأ الخبر من مصدره

محمد منفلوطي_هبة بريس

سطات يا جميلتي…مالي أراك حزينة!!!! هو وصف ليس من وحي الخيال، بل حقيقة يرددها كل غيور علنا أو همسا أوخلسة في حديث المجالس ونقاش المقاهي…

سطات يا سطات، ما من كانت تتغنى وديانا وحدائق غناء ورونقا أخاذ، يا من كانت تصنف من المدن الجميلة وتوأمة المدن داخل وخارج الوطن…يامن كانت توصف بعروس الشاوية…هاهي اليوم، تعرف تراجعا على كافة المجالات، اقتصاديا واجتماعيا وبيئيا… فهي التي اغتصبت شوارعها وأزقتها ودروبها لسنين كثيرة دون أن تراع حرماتها، طالتها جرافات الهدم والردم وسياسة الحفر التي لا تنتهي، فغيروا ملامحها وطمسوا معالمها، وصارت كصرح بلا تاريخ ولاعنوان….نهبوا ملكها العمومي واستباحوا حدائقها وقزموا من بساتينها وأزهارها وزرعوا عوضها كراسي وموائد خشبية لزوار لايغادرون إلا وثمن جلوسهم بعد احتسائهم كأش شاي أو قهوة مدفوع الأجر طبعا.

نعم… طالت أيادي التغيير، فطُمرت الملامح وضاعت معها ذكريات الطفولة البريئة، أين “المارشي القديم قبالة قيسارية الشاوية..أين مقهى كوميرس وبيسيس وسينما كاميرا، أين شارع محمد الخامس وما يحمله من ذكريات جميلة وارث تاريخي..

مدينتي الغالية كل شيء تغير فيك، أين فنانونك من صناع الفرجة الكبار من قبيل قشبال وزوال… أين مبدعوك من راسمي الابتسامة على محيا العباد من الحليقية الكبار مثل الربيب، وحمامو، وعبد الرحمن وعبد القادر الغرام، وووو، كلشي مشى مع الأيام…مابقي سوى ساحتك التي تحولت إلى مكان ” للتبول” ولعب ” ضامة وكارطة” وملتقى ” أصحاب المُوقَفْ”..

نعم، أنت التي تحولت بقدرة قادر إلى ضيعة خاصة في ملك أناس سال لعابهم على نهب ملك الدولة واستغلاله أمام أنظار المسؤولين بدون استحياء، فتحسنت أوضاعهم المادية والمعنوية على حساب المواطنين البسطاء و الشرفاء وعلى مصلحة الوطن، حتى أضحى الأمر كابوسا يهدد سلامة ومصالح المواطنين، الذين وجدوا أنفسهم مضطرين في كثير من الأحيان إلى النزول إلى الطرقات ومقارعة الشاحنات والسيارات، من أجل الوصول إلى غاياتهم لتفادي الاصطدام بهذه الأسوار المتحركة..

نعم، أنت التي تحولت شوارعك وأزقتك إلى مايشبه خرائط وخطوط سكك حديدية بفعل سياسة الحفر التي لا تنتهي، أنت التي تحولت ساحاتك ودروبك إلى أسواق شبه عشوائية تعج بمخلفات الأزبال والنفايات ومنطلقا لقطعان الكلاب الضالة التي تهاجم الأحياء وتفرض حظر التجوال على الناس ليلا وفجرا…

نعم، أنت الجريحة التي لم يُغير من حالك تعاقب المجالس المنتخبة شيئا، سوى وقوف البعض من أصحابها على حائط المبكى يشكون حالهم ويتنابزون بالألقاب خلال دوراتها…

نعم، أنت الشاهدة على تعهدات منتخبيك خلال حملاتهم الانتخابية…حين وقفوا متعهدين بتنزيل الاصلاحات والدفاع عن حقوق المواطنين والمواطنات في كافة المناسبات…

وإلى أن تمسحي دموعك وتنفضي عنك غبار الاهمال والتهميش، سأبقى وفيا لك، صوتا من أصوات شرفاء قومك ممن يحملون الهّم ذاته غيرة عندك وتعلقا بتربتك..

إقرأ الخبر من مصدره

سهام البارودي – كود//

كاين واحد الهوس جماعي عند المغاربة مع الدَار ! تاواحد مابقا باغي يكون كاري كلشي كايقلب يدير “الدّار ” حتى دوك الطبقات المقودة عليها كاتلقاه تاهوا كايقوليك الخوت بغيت ندير داري راه قهرنا الكرا ! انا هاد الجملة بالضبط ماعمرها كاتفهم ليا، كيفاش باغي دير دارك و نتا الكرا لي كرا و ساهل انك تبدلو و ساهل انك تحبسو و ساهل انك تهرب عليه گاع ( طبعا ماكانشجعكش تهرب) و ماقاديتيش عليه عاد الدَار لي دار ! طريطات د البانكة و مصاريف و اصلاحات و ضريبة د السكن كيفاش ؟

بزاف د المغاربة كايموتو بالجوع باش يديرو الدار ! كايحيدو من فلوس ولادهم و ماكلتهم و قرايتهم و شرابهم باش يبنيو الحيوط و يطلعو ايجاط فوق ايجاط ! عوض انه يستثمرو فالقراية د ولادهم مثلا !
منين جاي هادشي ؟ من بزاف د العوامل و أولها عدم الثقة لي عند المغربي فالدولة ! عارف راسو خاصو يجمع الفلوس و يديرهم تحت منو و يبني الدار و يحاول يكون مستقل بذاتو قد ما قدر ! حيت غدا و لا بعدو مع أول طارئ غايلقا راسو كايسعى ! شي كسيدة و لا شي مرضة كفيلة انها تقلب ليه حياتو و تخلي ولادو يتشردو ! الفلوس لي نورمالمو خاصهم يساهمو فعجلة الاقتصاد و يتخسرو فالترفيه و الثقافة و الرياضات و السفر و المتعة كايديرهم تحت الجليجة و يقرم عليهم ! ماكايستافد منهم هوا ماكايستافدو معاه عباد الله !

و حتى نهار كايبغي يدير شي استثمار كايبقا حابس فدوك الاستثمارات التقليدية ! يشري شي دار يكريها ! يحل قهوة ! يحل سناك … دير الماكلة هي لي كاتمشى ! دير شي حانوت د حوايج العيالات حيت العيالات ديما كايشريو الحوايج ! ماكاينش شي ابداع فالاستثمار ! حتى رجال الاعمال الكبار فالمغرب استثماراتهم بسيطة و كلاسيكية بزاف هادشي لي كايخلي الاقتصاد المغربي ماعندوش شي قيمة مضافة كبيرة ! راه لي خلا ميريكان تكون ميريكان هوا القدرة ديالها على تشجيع الافكار الجديدة و البحث العلمي ! علاش گووگل و فايسبوك و امازون و اير بي اند بي كلهم انطلقو من افكار بسيطة بزاف و لكن لقات العقليات لي كاتعاونها ! حنا لا ! حتى من الناس لي عندهم الفلوس عندنا استثماراتهم بليدة ! وزين د السردين ! فابريكا د الحوايج ! صونطر دابيل …

نفس العقلية لي عند المغربي البسيط ! عند رجال الاعمال الكبار ! و عند الدولة براسها ! كلهم واحلين فهاذا ما وجدنا عليه آباءنا ! المغربي البسيط باغي يحط فلوسو فالياجور ! و رجل الاعمال باغي يحل شي قهوة و الدولة كاتجيب الاستثمارات ديال الدراع لي الدول المتقدمة ولات كاتحيدها عليها من ارضها و تسيفطها لدول اليد العاملة فيهم رخيصة بزاف !

إقرأ الخبر من مصدره

محمد سقراط-كود///

المغرب كيطيح فيه الثلج في عدة مناطق من سوس حتى للشمال حتى فيكيك طاح فيها الثلج، ومع ذلك المغاربة كل عام كيمشيو لإفران يتجمعو تم يقطعو الطريق يديرو الكسايد يتزاحمو على المطاعم القليلة لي كاينة تم، يقاضيو الخبز ولما والحليب، وفي اللخر عوض تكون زيارة من أجل المتعة كتحول لتجربة بئيسة كتدوز أغلبها غير في التقلاب على الكرى أو حاصل في الزحام ديال الطوموبيلات، أو تقلب على فين تاكل، بينما مناطق كثيرة وزوينة بزاف كيطيح فيها الثلج بالأطنان ومع ذلك المغاربة معندهمش معاها، كذلك الأمر حتى في الصيف في بلاد عندها واجهة بحرية ديال 3500 كلم طبعا ماشي كلها صالحة للسباحة ولكن راه فيها بزاف ديال البلايص من غير مارتيل لي كيتزاحم فيه كولشي حتى كتوصل الخبزة ديال درهم لعشرة دراهم ولكرى ديال برطمة إقتصادية لثمن اوطيل سانك ايطوال في بلدان سياحية كبيرة.

السياحة الثلجية فيها الصرف في العالم إلا في المغرب أول حاجة غادي تلاحظها في الناس لي طالعين يشوفو الثلج هو الحوايج لي لابسين ، بنادم غادي للثلج بسبرديلة وسروال جين أو كيطمة سخونة متعرفو واش غادي يلعب في الثلج ولا يلقط الروماتيزم، حتى دخل ديكاتلون للمغرب عاد بدا بنادم شوية يلبس الحوايج لي صالحين للطبيعة أما الأغلبية لحد الآن راه كيطلعو باش مكان يضربهم البرد ويجيو، وفي الغالب فاش كيوصلو لهاد المدينة لي فيها الثلج كيبداو يقلبو على فين يتخباو منو شي قهوة يكلسو فيها أو مطعم ياكلو فيه ، مكاين بو أنشطة وألعاب ثلجية داكشي فقط طلق البراهش يلعبو واجي نتخباو.

بالنسبة ليا أجمل منطقة فيها الثلج في المغرب هي بويبلان خاصها فقط الطريق والتجهيزات وتولي من أجمل المنتجعات السياحية لعدة أسباب منها الكميات ديال الثلج لي كتطيح تم، بالإظافة لجمال المنطقة والمنتزهات لي حداها بحال منتزه تازكا وغابة الأرز الملكي ومضايق سماعين وبزاف ديال القنات ا لي فيهم مايتشاف ويتزار، وفرنسا ماشي غير جاو وبناو أول منتجع للألعاب الثلجية في المغرب داروه تما، خاصو غير الطريق وماشي شي حاجة لي خارقة عندو بلايص كثار منين دوز ليه الواحد وكتبقى أجمل المناطق في المغرب كذلك نواحي مراكش كاين ويرغان من ورا أيمليل السد لتحت والثلج الفوق ومناظر طبيعية خيالية وهادشي خاصو إرادة حقيقية باش يخلق التنوع في المغرب ومايبقاش بنادم غير تطيح قطرة ديال الثلج يجري لإيفران.

إقرأ الخبر من مصدره