مصطفى الشاذلي- كود سبور//
كاين شي فئة فالمغرب كتبغي تشوف فالمنتخب الوطني ما هو أبعد من الكرة، كتبغي دير عليه إسقاطات كتجاوز الرياضة والاستحقاق الرياضي لما هو أبعد، مع العلم أن وظيفة اللاعب هي فالميدان وفقط لا غير.
عز الدين أوناحي لاعب كبير، دخل لكتب التاريخ صافي، معندوش باقي ميبرر لأي شخص كان، ملي كدير 3 الماتشات فالأدوار الإقصائية لكأس العالم بداك النيفو، وكتخلي كاع المدربين يتعجبو، فنتا كتكون دخلتي للتاريخ ومعندك باقي فين تزيد تبرر.
غير أنه وفجميع القضايا المرتبطة بالكرة، الجمهور فالمغرب نظرا للجهل الكبير ديالو بالرياضة واخا كيتبعها، كيولي كيقلب للعابة على هفوات، وعلى أخطاء مكايناش أصلا، وماشي من المفترض تكون فلعاب د الكورة.
لا بيلي لا مارادونا لا كرويف لا بيكنباور ولا أي عظيم د الكرة، كان عبقري فالدراسة ولا كان عندو تفوق أكاديمي، ولكن جل هاد اللعابة كان عندهم نبوغ كروي، ذكاء من نوع خاص اللي عند الجوهرة ديالنا أوناحي، نبوغ فطري واخا تبغي تقرا باش تولي بحالة متقدرش توصل ليه أصلا.
أنه يخرج يتعشى ويوقع مشكل بسيط ما عند الجمهور تا دخل فيه أصلا، هي أشياء عادية وأقل من العادية، بل ومعندهاش لاش تذكر أصلا، لأن السيد ما خرق قانون ما تعدى على أي كان.
بل المشكل الأكبر هو أنها تفتح الباب لناس يهاجمو لاعبي المنتخب، ويطلبو منهم يكونو عباقرة زمانهم أكاديميا، فهادشي من باب الحماق، مبقاش من باب التعبير عن الرأي ولا تشجيع المنتخب.
عز الدين أوناحي وصحابو محتاجينا ندعموهم فالملعب، محتاجينا نتبعوهم العام كامل ونشجعوهم، باش ملي تجي شي بطولة مجمعة نلاقوهم فأحسن حال، ويعاودو يفرحونا بأكثر من هادشي اللي فرحونا بيه.
أما معاول الهدم والحقد على الدولة اللي كيتصرف فمواقف ضد المنتخب، فهو يدين ماليه أصلا ماشي لعاب متربي ومخلق بحال أوناحي.
